Səlahəddin Xəlilov Professor Səlahəddin Sədrəddin oğlu Xəlilov 1952-ci ildə Borçalı mahalında anadan olmuşdur.
1990-cı ildən fəlsəfə elmləri doktoru, 2007-ci ildən Azərbaycan Milli Elmlər Akademiyasının müxbir üzvüdür.
1991-2006-cı illərdə Azərbaycan Universitetinin rektoru, 2000-2005-ci illərdə Azərbaycan Respublikası Milli Məclisinin deputatı olmuşdur. Azərbaycan Respublikası Prezidenti yanında AAK Rəyasət Heyətinin üzvü, Azərbaycan Fəlsəfə və Sosial-Siyasi Elmlər Assosiasiyasının İdarə Heyətinin sədri, Beynəlxalq Rektorlar Şurasının, Amerika Fəlsəfə Cəmiyyətinin, Avropa Elm Fəlsəfəsi Təşkilatının, bir sıra xarici ölkə Akademiyalarının üzvü, “Fəlsəfə” jurnalının baş redaktoru, AMEA-nın Fəlsəfə, Politologiya və Sosiologiya elmləri üzrə Problem Şurasının sədridir.
Azərbaycanda və xarici ölkələrdə 38 kitabı və 400-dən çox elmi məqaləsi nəşr olunmuşdur. O cümlədən: “Основания научно-технического прогресса” (М., 1998); “Lider, dövlət, cəmiyyət” (Bakı, 2001), “Şərq-Qərb: ümumbəşəri ideala doğru” (Bakı, 2004; Tehran, 2005; İstanbul, 2006), “Təhsil. Təlim. Tərbiyə” (Bakı, 2005), “Fəlsəfə: tarix və müasirlik” (Bakı, 2006), “Mənəviyyat fəlsəfəsi” (Bakı, 2007), “Philosophy, Science, Culture. Their Peculiarites in the East and the West” (Stockholm, 2008), “Dogu’dan Batı’ya felsefe körpüsü” (İstanbul, 2008) və s. Beynəlxalq fəlsəfə konqresləri və konfranslarında ölkəmizi müntəzəm surətdə təmsil edir.
|