Ramiz MEHDİYEV Yeni siyasət: inkişafa doğru. 2 cilddə. I cild.
Bakı, «Azərbaycan» qəzeti, 2008, 581 səh. Ön sözün müəllifi: f.e.d., prof. R.Aslanova.
«Yeni siyasət: inkişafa doğru» kitabı Azərbaycan Respublikası Prezidentinin İcra Aparatının rəhbəri, həqiqi dövlət müşaviri, akademik Ramiz Mehdiyevin 2006-2008-ci illərdə «Azərbaycan» qəzetində dərc edilən əsərlərinin və onlara həsr edilən rəylərin məcmusudur. Azərbaycanın müstəqillik dövrünün fundamental salnaməsi olan bu əsərlərdə ölkəmizdəki sosial-iqtisadi tərəqqi, baş verən mütərəqqi siyasi dəyişikliklər, aparılan hüquqi-demokratik islahatlar konseptual şərh edilmiş, Heydər Əliyev irsinin milli inkişaf strategiyasına çevrilməsi və bu siyasi xəttin Prezident İlham Əliyev tərəfindən layiqincə davam etdirilməsi əsaslandırılmışdır. Tanınmış elm xadimlərinin, ziyalıların, mütəxəssislərin rəylərində isə Azərbaycanın son 15 illik dövrünü əhatə edən intibah mərhələsi məhz bu araşdırmaların kontekstində təhlil olunmuşdur. «Azərbaycan» qəzetinin «Azərbaycanın özü qədər əbədi» silsiləsindən nəşr etdirdiyi bu növbəti kitab elmi ictimaiyyət, geniş oxucu kütləsi və Heydər Əliyev irsinin tədqiqatçıları üçün dəyərli töhfədir.
Yeni siyasət: inkişafa doğru. 2 cilddə. II cild. Bakı, «Azərbaycan» qəzeti, 2008, 343 səh.
Kitab Azərbaycanın seçdiyi inkişaf yolunun təməl prinsiplərinin müasir müasir dövrün tələbləri baxımından elmi-nzəri cəhətdən araşdırılmasına həsr olunmuşdur. Ümummilli lider Heydər Əliyev tərəfindən müəyyən edilmiş bu prinsiplər ölkəmizin hazırkı tərəqqi mərhələsində də milli inkişaf strategiyasının əsasını təşkil edir. Dörd bölmədən ibarə olan kitabda Azərbaycan şəraitində iqtisadiyyatdan demokratiyaya, sabitlikdən modernləşməyə doğru tranzitin xüsusiyyətlərindən bəhs edilir, güclü dövlət, modernləşmiş iqtisadiyyatvə azad vətəndaş cəmiyyəti quruculuğu yolunda Prezident İlham Əliyevin qarşıdakı dövr üçün fəaliyyətinin gündəliyinin ümumi mənzərəsi verilir. Kitab ictimai elmlər sahəsində çalışan mütəxəssislər, siyasətçilər, ali məktəblərin humanitar fakültələrinin tələbələri, ümumiyyətlə, kütləvi oxucular üçün nəzərdə tutulmuşdur.
|